حالیہ ٹارگٹ کلنگ نے کراچی آپریشن کی قلعی کھول دی

کراچی(اے این ایف نیوز) پاکستان تحریک انصاف کے مرکزی رہنماءشاہ محمود قریشی نے کہا ہے کہ حالیہ ٹارگٹ کلنگ نے کراچی آپریشن کی قلعی کھول دی ہے، شہر میں ایک ساتھ ہی عباس کمیلی کے بیٹے علی اکبر کمیلی ، حیدر عباس رضوی کے کوآرڈینیٹر اورمفتی نعیم کے بیٹے کو نشانہ بنایا گیا، ہمیں کراچی کے حالات پر شدید تشویش ہے کیونکہ اگر کراچی میں کچھ ہوتا ہے تو اس کے اثرات پورے ملک میں نظر آتے ہیں۔ میڈیا سے گفتگو میں انہوں نے کہا کہ احتجاج کرناہمارا حق ہے، سپریم کورٹ نے یہ حق تسلیم کیا ہے لیکن وہاں ہمارے گرد پولیس کو لاٹھیاں دے کر بٹھایا گیاہے، ایک طرف اسحاق ڈار ہمارے ساتھ مذاکرات کر رہے ہیں تو دوسری جانب ملک بھر میں ہمارے کارکنوں کو گرفتار کر لیا گیا، ہمارے ’ڈی جے بٹ‘تک کو گرفتار کر لیا گیا ہے، حکومت نے ماضی سے کچھ نہیں سیکھا۔ ان کا کہنا تھا کہ اگر حکومت نے کوئی ڈیم بنایا ہوتا، کوئی انتظامات کئے ہوتے تو آ ج یہی پانی ہمارے لئے رحمت بن جاتا، اور پورے ملک میں کوئی نقصان نہ ہوتا مگر پیپلز پارٹی اور مسلم لیگ ن دونوں نے ہی اس ضمن میں کوئی کام نہیں کیا۔ انہوں نے اعلان کیا کہ اسلام آباد دھرنے سے فارغ ہو کر عمران خان سندھ اور کراچی کا دورہ کریں گے۔