ستمبر 1965ءکی جنگ پاکستان کی دفاعی تاریخ کا درخشاں باب ہے۔ وزیر اعلٰی پنجاب شہباز شریف

  

لاہور(اے این ایف نیوز )وزیر اعلٰی پنجاب شہباز شریف نے کہا ہے کہ ستمبر 1965ءکی جنگ پاکستان کی دفاعی تاریخ کا درخشاں باب ہے۔ یوم دفاع کے موقع پر ہمیں باہمی اختلافات بھلا کر وطن عزیز کے استحکام کے لئے مل جل کر کام کرنے کا عہد کرنا ہوگا۔یوم دفاع کے موقع پر باٹاپور میں یوم شہداءپر حاضری کے موقع پر وزیراعلی محمد شہباز شریف کا کہنا تھا کہ افواج پاکستان کے افسران اور جوان ملک کو دہشت گردی کی لعنت سے پاک کر کے امن کا گہوارہ بنانے کے لئے بیش قیمت قربانیاں دے رہے ہیں، ستمبر1965ءکی جنگ میں پاک افواج نے عزم و ہمت اور جرات و بہادری کی لازوال مثالیں قائم کیں، پاک افواج وطن کے استحکام کےلئے دہشت گردی کے خلاف جنگ میں بھی بہادری کی نئی تاریخ رقم کر رہی ہیں۔ وزیر اعلی کا مزید کہنا تھا کہ ملک کے دفاع کی جنگ کے دوران قوم نے زبردست وحدت اور اتحاد کا عملی ثبوت دیا،آج پھر 1965ءوالے جذبے اور اتحاد و یکجہتی کی ضرورت ہے،یوم دفاع کے موقع پر پاکستان کو معاشی قوت بنانے کے لئے اپنا خون پسینہ ایک کرنے کا عہد کرنا ہوگا۔