وزیراعظم میاں محمد نواز شریف بھی وفاقی وزیر داخلہ چوہدر نثار علی خان پریس کانفرنس کر نے سے باز رکھنے میں ناکام

اسلام آباد(اے این ایف نیوز ) وزیراعظم میاں محمد نواز شریف بھی وفاقی وزیر داخلہ چوہدر نثار علی خان کو پیپلز پارٹی کے رہنماءسینیٹر اعتزا ز احسن کے خلاف پریس کانفرنس کر نے سے باز رکھنے میں ناکام ہوگئے ہیں تاہم پریس کانفرنس کو ذاتی وضاحت تک محدود رکھنے پر اتفاق ہو گیا ہے،وزیر داخلہ نے وزیر اعظم سے گلے شکوے بھی کیے ،وزیر اعظم کاکہنا تھا کہ پریس کانفرنس کا ممکنہ ردعمل آ سکتا ہے اور پیپلزپارٹی پارلیمنٹ کے مشترکہ اجلاس سے واک آﺅٹ کر سکتی ہے۔ ۔تفصیلات کے مطابق وزیراعظم ہاﺅس میں وزیراعظم میاں محمد نواز شریف سے وزیر داخلہ چوہدری نثار علی خان نے اہم ملاقات کی،ذرائع کا کہنا ہے کہ چودھری نثار سے گفتگو میں وزیر اعظم میاں نواز کا کہنا تھا کہ آپ کی ممکنہ پریس کانفرنس کا رد عمل آ سکتا ہے اور پیپلزپارٹی پارلیمنٹ کے مشترکہ اجلاس سے واک آوٹ کر سکتی ہے ، اس وقت تمام جماعتوں کو متحد ہو کر جمہوریت کا دفاع کرنا ہے۔ ذرائع نے بتایا کہ وفاقی وزیر داخلہ چودھری نثار نے وزیر اعظم سے گلے شکوے بھی کیے اور کہا کہ پہلے آپ نے پریس کانفرنس کی اجازت دی لیکن اب منع کر رہے ہیں، میں نے آپ کے کہنے پر ایوان میں بات نہیں کی ،اپنے مرحوم بھائی لیفٹیننٹ جنرل ریٹائرڈ افتخار علی خان اور خود پر عائد کیے گئے الزامات کا جواب دینا ہے۔ ذرائع نے بتایا کہ وزیر داخلہ چودھری نثار نے موقف اختیار کیا کہ اعتزاز احسن سے متعلق جو بات کی ہے اس کے ثبوت بھی موجود ہیں، اعتزاز احسن نے سوچے سمجھے منصوبے کے تحت مجھے ٹارگٹ کیا ہے۔ علاوہ ازیں وزیر داخلہ چوہدری نثار علی خان نے وزارت داخلہ کو سینیٹر اعتزاز احسن کی جائیداد اور ذرائع آمد ن کے بارے میں مواد جمع کرنے کی ہدایت کر دی ہے ۔یاد رہے کہ وزیر داخلہ چودھری نثار شام چھ بجے شیڈول کے مطابق پریس کانفرنس کریں گے۔ گزشتہ دو روز کے دوران چوہدری نثار اور اعتزاز احسن کی جانب سے سخت جملوں کا تبادلہ خیال کیا گیا ہے جس میں ایک دوسرے پر کرپشن اور جعل سازی میں ملوث ہونے کے سنگین الزامات عائد کیے گئے ہیں۔ پارلیمنٹ کے مشترکہ اجلاس کے چوتھے روز ایوان کے فلور میں اعتزاز احسن نے اظہار خیال کے موقع پر چوہدری نثار علی خان کو آڑھے ہاتھوں لیا اور خوب دھو یا جس کے بعد چوہدری نثار ایوان سے روٹھ کر چلے گئے۔