ہائیکورٹ نے وزیرِاعظم نواز شریف کے خلاف دائر نااہلی کی اپیل مسترد کردی

لاہور(اے این ایف نیوز ) ہائیکورٹ نے وزیرِاعظم نواز شریف کے خلاف دائر نااہلی کی اپیل مسترد کردی ہے۔تفصیلات کے مطابق ہائیکورٹ میں وزیراعظم نواز شریف کی نااہلی کے خلاف دائر کی گئی انٹرا کورٹ اپیل کی سماعت جسٹس اعجاز الحسن اور جسٹس فیصل زمان پر مشتمل دو رکنی بینچ نے کی ۔ درخواست گزار گوہر نواز سندھو نے موقف اختیار کیا کہ وزیراعظم نے قومی اسمبلی میں فوج کے خلاف غلط بیانی کی جس سے وزیراعظم آرٹیکل 62 کی خلاف ورزی کے مرتکب ہوئے ہیں۔ سماعت کے دوران ہائیکورٹ نے ریمارکس دیتے ہوئے کہا کہ اگر وزیراعظم کہتے ہیں کہ فوج کو ثالثی نہیں، سہولت کاری کیلئے کہا تو اس میں جھوٹ کہاں ہے، یہ الفاظ کا گورکھ دھندہ ہے، اسمبلیوں کی کارروائی کو عدالت میں چیلنج نہیں کیا جا سکتا۔عدالت نے درخواست گزار کی اپیل مستر د کرتے ہوئے ہدایت کی کہ وزیراعظم کو نااہل قرار دینے کیلئے متعلقہ فورم سے رجوع کیا جائے۔