شہر کو بچانے کے ہیڈ محمد والا بند میں 100فٹ چوڑا شگاف ڈال دیا گیا

 ملتان(اے این ایف نیوز )دریائے چناب کا چار لاکھ 50 ہزار کیوسک کا سیلابی ریلا ملتان سے گزر رہا ہے اور شہر کو بچانے کے ہیڈ محمد والا بند میں 100فٹ چوڑا شگاف ڈال دیا گیا ہے ،دوسری جانب پاک فوج اور بحریہ کے جوان امدادی کاموں میں مصروف ہیں ۔ تفصیلات کے مطابق دریائے چناب سے چار لاکھ 50 ہزار کیوسک کا سیلابی ریلا ملتان کی حدود سے گزر رہا ہے جبکہ سیلابی پانی سکندری نالے تک پہنچ گیا ہے، سیلابی پانی کی وجہ سے بستی ممروٹ ،بستی سیال ،قاسم بیلہ ، محمد پور گھوٹا اور نواب پور کی مزید بستیاں زیر آب آگئی ہیں جس سے متاثرین کی بڑی تعداد گھروں میں محصور ہو کر رہ گئی ہے جنہیں نکالنے کا سلسلہ جاری ہے۔ملتان شہر کو بچانے کے لیے ہیڈ محمد والا بند پر بارودی مواد نصب کر کے اس میں 100فٹ چوڑا شگاف ڈال دیا گیا ہے تاہم تاحال شیر شاہ بند توڑنے کے حوالے سے لائحہ عمل کا اعلان نہیں کیا گیا ہے۔ذرائع کے مطابق تین لاکھ سے زائد کیوسک کا مزید سیلابی ریلا آئندہ بارہ گھنٹوں میں شیر شاہ اور ہیڈ محمد والا بند سے ٹکرائے گا۔ دوسری جانب آئی ایس پی آر کے مطابق کور کمانڈر ملتان لیفٹیننٹ جنرل عابد پر ویز شہر کی نگرانی کرہے ہیں اور پاک فوج کی ٹیمیں متاثرین کو محفوظ مقامات پر منتقل کر رہی ہیں ۔ علاوہ ازیں پاکستان نیوی کے ترجمان کا کہنا ہے کہ بحریہ کی امدادی کشتیا ں، غوطہ خور اور ہیلی کاپٹر بھی متاثرہ علاقوں میں پہنچ گئے ہیں ،بحریہ کی طبی امدادی ٹیموں نے متاثرین کو علاج معالجے کی مدد بھی فراہم کی ،پاک بحریہ کی ٹیمیں جھنگ اور چنیوٹ میں مصروف عمل ہیں ۔