پاکستان تحریک انصاف کے پنجاب اسمبلی کے 29 ارکان پارلیمنٹ نے استعفوں کے باوجود ماہ ستمبر میں تنخواہیں اسمبلی سیکرٹریٹ سے وصول کرلی

لاہور (اے این ایف نیوز) پاکستان تحریک انصاف کے پنجاب اسمبلی کے 29 ارکان پارلیمنٹ نے استعفوں کے باوجود ماہ ستمبر میں تنخواہیں اسمبلی سیکرٹریٹ سے وصول کرلی ہیں ایک اسمبلی رکن کی بمعہ الاﺅنس ماہوار تنخواہ 45 ہزار روپے بنتی ہے، تنخواہیں وصول کرنے والوں میں پنجاب اسمبلی میں قائد حزب اختلاف میاں محمود الرشید بھی شامل ہیں اور اب تک مستعفی ہونے والے ارکان کو دی جانے والی مراعات بھی ان ارکان نے واپس نہیں کی ہیں۔ ذرائع کے مطابق جب تک ان مستعفی ہونے والے پاکستان تحریک انصاف کے استعفوں پر سپیکر پنجاب اسمبلی ان کی اسمبلی رکنیت منسوخ کرنے کا نوٹیفکیشن جاری نہیں کرتے ہیں تب تک ان ارکان کو تمام تر رکن اسمبلی کی حیثیت سے مراعات حاصل رہیں گی مگر کوئی ارکان اسمبلی اپنی مرضی سے ان مراعات کو نہ لینا چاہے تو یہ اس کی اپنی مرضی ہے یاد رہے کہ پاکستان تحریک انصاف کی جانب سے عام انتخابات 2013ءمیں مبینہ دھاندلی پر 14 اگست سے شروع ہونے والے لاہور سے اسلام آباد تک آزادی مارچ اور پھر اسلام آباد میں دھرنے اور وزیراعظم کے استعفیٰ کا مطالبہ کے سلسلہ میں پاکستان تحریک انصاف کے پنجاب اسمبلی میں 30 ارکان اسمبلی میں سے 29 ارکان نے استعفے دے رکھے ہی ں مگر اب تک قائد حزب اختلاف سمیت ان تمام استعفے دینے والے ارکان پارلیمنٹ نے اب تک اسمبلی سے ملنے والی سہولیات واپس نہیں کی ہیں۔